टेक्सासमध्ये झालेल्या प्रलयंकारी पूरामुळे ४ जुलैच्या सप्ताहअखेरपासून आतापर्यंत १०० हून अधिक लोकांचा मृत्यू झाला असून १६० पेक्षा जास्त लोक अद्याप बेपत्ता आहेत, अशी माहिती राज्याचे गव्हर्नर ग्रेग अॅबॉट यांनी मंगळवारी दिली. बेपत्ता झालेल्यांपैकी बहुतेक जण केर काउंटीमध्ये आहेत, जिथे पूराचा सर्वाधिक फटका बसला आहे.
ग्वाडालूप नदीच्या काठावर असलेल्या हिल कंट्री भागातील अनेक युवक शिबिरे आणि कॅम्पग्राउंड्समध्ये सुट्टीसाठी आलेले लोक बेपत्ता आहेत, कारण त्यातील अनेकांनी कॅम्प किंवा हॉटेलमध्ये अधिकृत नोंदणी केली नव्हती. केर काउंटीतील ऐतिहासिक ‘कॅम्प मिस्टिक’ या मुलींच्या ख्रिश्चन समर कॅम्पमध्ये किमान २७ मुली आणि कर्मचाऱ्यांचा मृत्यू झाला असून, पाच मुली आणि एक काऊन्सलर अद्याप सापडलेले नाहीत.
बचाव आणि शोधमोहीम सुरू असून, शेकडो स्वयंसेवक आणि सरकारी पथके मदतीसाठी उतरली आहेत. पूरग्रस्त भागात अजूनही मोठ्या प्रमाणावर चिखल, मोडलेली झाडे, वाहून गेलेली वाहने आणि वस्तू आढळून येत आहेत.
गव्हर्नर अॅबॉट यांनी सांगितले की, “प्रत्येक बेपत्ता व्यक्ती सापडेपर्यंत शोधमोहीम थांबवली जाणार नाही.” अमेरिकेचे अध्यक्ष डोनाल्ड ट्रम्प यांनी टेक्सासला आवश्यक ती सर्व मदत देण्याचे आश्वासन दिले आहे.
स्थानिक प्रशासनाने हवामानाचा इशारा आणि पूराचा धोका याबाबत योग्य वेळी सूचना दिल्या का, यावर प्रश्न उपस्थित होत आहेत. मात्र, सध्या प्रशासनाचे लक्ष फक्त बचाव आणि मृतदेह शोधण्यावर केंद्रित असल्याचे अधिकाऱ्यांनी स्पष्ट केले आहे.