बारामती, २९ जानेवारी (पीटीआय) — विमान अपघातात निधन झालेल्या उपमुख्यमंत्री अजीत पवार यांना गुरुवारी बारामतीत शासकीय इतमामात अखेरचा निरोप देण्यात आला. हजारो शोकाकुल नागरिकांनी उपस्थिती लावली.
विद्या प्रतिष्ठानच्या मैदानावर पवार यांचे पुत्र पार्थ आणि जय यांनी चितेला अग्नी दिला. पत्नी व राज्यसभा खासदार सुनेत्रा पवार यांना अश्रू अनावर झाले. “अजीत दादा अमर रहे” अशा घोषणा परिसरात घुमत होत्या.
केंद्रीय मंत्री अमित शाह, नितीन गडकरी, मुरलीधर मोहोळ, माजी केंद्रीय मंत्री शरद पवार, भाजप अध्यक्ष नितीन नाबीन उपस्थित होते. मुख्यमंत्री देवेंद्र फडणवीस, उपमुख्यमंत्री एकनाथ शिंदे तसेच खासदार सुप्रिया सुळे यांनी सुनेत्रा पवार यांचे सांत्वन केले.
काटेवाडी येथून राष्ट्रीय ध्वजाने आच्छादित पार्थिव विद्या प्रतिष्ठान मैदानावर आणण्यात आले तेव्हा हजारो नागरिक आणि राष्ट्रवादी काँग्रेसचे कार्यकर्ते उपस्थित होते. प्रफुल्ल पटेल, माजी मुख्यमंत्री सुशीलकुमार शिंदे, अशोक चव्हाण, काँग्रेस प्रदेशाध्यक्ष हर्षवर्धन सपकाळ आणि अभिनेता रितेश देशमुख यांनीही श्रद्धांजली वाहिली.
याआधी उद्धव ठाकरे व राज ठाकरे यांनी काटेवाडी येथील निवासस्थानी पुष्पहार अर्पण केला. अंत्यसंस्कारादरम्यान शांतता व शिस्त राखण्याचे आवाहन करण्यात आले.
बारामतीतील टेबलटॉप एअरस्ट्रीपपासून अवघ्या २०० मीटर अंतरावर लियरजेट कोसळून अपघात झाला. या दुर्घटनेत अजीत पवारांसह पाच जणांचा मृत्यू झाला. ब्लॅक बॉक्स हस्तगत करण्यात आला असून पोलिसांनी अपघाती मृत्यूची नोंद केली आहे.