नवी दिल्ली, १२ फेब्रुवारी (पीटीआय) १९८० आणि १९९० च्या दशकातील टीव्ही वृत्तविश्वातील परिचित चेहरा असलेल्या माजी दूरदर्शन वृत्तनिवेदिका सरला महेश्वरी यांचे गुरुवारी दिल्ली येथे निधन झाले. कुटुंबीय मित्र शम्मी नारंग यांनी ही माहिती दिली. त्या ७१ वर्षांच्या होत्या.
महेश्वरी यांनी १९७६ ते २००५ या काळात दूरदर्शनवर वृत्तनिवेदिका म्हणून काम केले. त्या काळात प्रसारण दिवसातून काही तासांपुरते मर्यादित होते आणि त्या भारतातील टीव्ही वृत्तक्षेत्रातील अग्रणी व्यक्तींमध्ये गणल्या जात होत्या.
त्यांचे सह-अँकर असलेले नारंग यांनी ‘एक्स’ आणि इंस्टाग्रामवर ही बातमी जाहीर केली.
ते म्हणाले, “माझ्या माजी सह-वृत्तनिवेदिका सरला महेश्वरी यांच्या निधनाची बातमी जाहीर करताना मला अत्यंत दु:ख होत आहे.”
नारंग यांनी त्यांना “सौजन्य आणि शालीनतेची मूर्ती” असे संबोधले.
ते म्हणाले, “त्या केवळ रूपानेच नव्हे तर मनानेही सुंदर होत्या. भाषेवर त्यांचे विलक्षण प्रभुत्व होते आणि त्या ज्ञानाचा मोठा साठा होत्या. दूरदर्शनच्या पडद्यावर त्यांची उपस्थिती वेगळीच आभा निर्माण करीत असे. त्या सर्वांचा आदर करीत आणि ज्या ठिकाणी असत ते वातावरण उंचावत असत.”
त्यांचे अंत्यसंस्कार सायंकाळी ४ वाजता निगम बोध घाट येथे होणार आहेत.
माहितीनुसार, दिल्ली विद्यापीठातून पीएचडी पूर्ण केल्यानंतर त्यांनी सार्वजनिक प्रसारमाध्यमात प्रवेश केला. तीन दशकांच्या कारकिर्दीत त्यांनी कृष्णधवल ते रंगीत प्रसारण असा दूरचित्रवाणी वृत्तक्षेत्रातील बदल अनुभवला.
दूरदर्शनने ‘एक्स’वर पोस्ट करून म्हटले, “दूरदर्शन परिवाराकडून सौ. सरला महेश्वरी यांना भावपूर्ण श्रद्धांजली. त्या दूरदर्शनच्या आदरणीय वृत्तनिवेदिका होत्या. त्यांच्या मधुर आवाज, शुद्ध उच्चार आणि शालीन सादरीकरणामुळे त्यांनी भारतीय वृत्तजगतामध्ये विशेष स्थान निर्माण केले. त्यांच्या साधेपणा, संयम आणि व्यक्तिमत्त्वाने प्रेक्षकांच्या मनात गाढ विश्वास निर्माण केला.”