ਨਵੀਂ ਦਿੱਲੀ, 9 ਸਤੰਬਰ (ਪੀਟੀਆਈ) ਅਦਾਕਾਰਾ ਕਰਿਸ਼ਮਾ ਕਪੂਰ ਦੇ ਦੋ ਬੱਚਿਆਂ ਨੇ ਮੰਗਲਵਾਰ ਨੂੰ ਦਿੱਲੀ ਹਾਈ ਕੋਰਟ ਵਿੱਚ ਅਰਜ਼ੀ ਦਿੱਤੀ ਅਤੇ ਆਪਣੇ ਦਿਵੰਗਤ ਪਿਤਾ ਸੰਜੇ ਕਪੂਰ ਦੀ ਲਗਭਗ 30,000 ਕਰੋੜ ਰੁਪਏ ਦੀ ਜਾਇਦਾਦ ਵਿੱਚ ਹਿੱਸੇਦਾਰੀ ਦੀ ਮੰਗ ਕੀਤੀ।
ਇਹ ਮਾਮਲਾ, ਜਿਸ ਦੀ ਸੁਣਵਾਈ 10 ਸਤੰਬਰ ਨੂੰ ਹੋ ਸਕਦੀ ਹੈ, ਸੰਜੇ ਦੀ 21 ਮਾਰਚ ਦੀ ਵਸੀਅਤ ਨੂੰ ਚੁਣੌਤੀ ਦਿੰਦਾ ਹੈ, ਜਿਸ ਵਿੱਚ ਉਸਦੀ ਸਾਰੀ ਨਿੱਜੀ ਜਾਇਦਾਦ ਉਹਨਾਂ ਦੀ ਸੌਤੇਲੀ ਮਾਂ ਪ੍ਰੀਆ ਕਪੂਰ ਦੇ ਨਾਮ ਕੀਤੀ ਗਈ ਹੈ।
ਅਰਜ਼ੀ ਵਿੱਚ ਕਿਹਾ ਗਿਆ ਹੈ ਕਿ ਨਾ ਤਾਂ ਸੰਜੇ ਨੇ ਕਦੇ ਇਸ ਵਸੀਅਤ ਬਾਰੇ ਦੱਸਿਆ ਅਤੇ ਨਾ ਹੀ ਪ੍ਰੀਆ ਜਾਂ ਕਿਸੇ ਹੋਰ ਨੇ ਇਸਦਾ ਜ਼ਿਕਰ ਕੀਤਾ।
ਇਸ ਵਿੱਚ ਦੋਸ਼ ਲਾਇਆ ਗਿਆ ਹੈ ਕਿ ਪ੍ਰੀਆ ਦਾ ਵਿਹਾਰ “ਬਿਨਾ ਕਿਸੇ ਸ਼ੱਕ ਦੇ ਦਿਖਾਉਂਦਾ ਹੈ ਕਿ ਇਹ ਵਸੀਅਤ ਉਸਨੇ ਹੀ ਬਣਾਈ ਹੈ।”
ਅਰਜ਼ੀ ਵਿੱਚ ਕਿਹਾ ਗਿਆ ਹੈ, “ਵਾਦੀਆਂ ਦੇ ਪਿਤਾ ਵੱਲੋਂ ਬਣਾਈ ਗਈ ਇਹ ਵਸੀਅਤ ਕਾਨੂੰਨੀ ਤੌਰ ’ਤੇ ਸਹੀ ਨਹੀਂ, ਇਹ ਨਕਲੀ ਅਤੇ ਜਾਲਸਾਜ਼ੀ ਹੈ ਅਤੇ ਸ਼ੱਕੀ ਹਾਲਾਤਾਂ ਵਿੱਚ ਤਿਆਰ ਕੀਤੀ ਗਈ ਹੈ। ਇਸ ਲਈ ਇਸਦੀ ਅਸਲ ਜਾਂ ਕਾਪੀ ਬੱਚਿਆਂ ਨੂੰ ਨਹੀਂ ਦਿਖਾਈ ਗਈ।”
ਅਰਜ਼ੀ ਵਿੱਚ ਜਾਇਦਾਦ ਦੀ ਵੰਡ, ਹਿਸਾਬ ਪੇਸ਼ ਕਰਨ ਅਤੇ ਸਥਾਈ ਪਾਬੰਦੀ ਦੀ ਮੰਗ ਕੀਤੀ ਗਈ ਹੈ।
ਵਾਦੀਆਂ ਦਾ ਕਹਿਣਾ ਹੈ ਕਿ ਉਹਨਾਂ ਨੂੰ ਆਪਣੇ ਪਿਤਾ ਦੀ ਮੌਤ ਦੇ ਸਮੇਂ ਉਸਦੀ ਨਿੱਜੀ ਜਾਇਦਾਦ ਬਾਰੇ ਪੂਰੀ ਜਾਣਕਾਰੀ ਨਹੀਂ ਹੈ।
ਉਹਨਾਂ ਨੇ ਪ੍ਰੀਆ ਨੂੰ ਹੁਕਮ ਦੇਣ ਦੀ ਮੰਗ ਕੀਤੀ ਹੈ ਕਿ ਸੰਜੇ ਦੀ ਮੌਤ ਦੇ ਸਮੇਂ ਉਸਦੀ ਪੂਰੀ ਨਿੱਜੀ ਜਾਇਦਾਦ ਦਾ ਖੁਲਾਸਾ ਕਰੇ।
ਧੀ ਨੇ ਆਪਣੀ ਮਾਂ ਕਰਿਸ਼ਮਾ ਰਾਹੀਂ (ਜਨਰਲ ਪਾਵਰ ਆਫ ਅਟਾਰਨੀ ਦੇ ਕੇ) ਅਰਜ਼ੀ ਦਿੱਤੀ ਹੈ, ਜਦਕਿ ਨਾਬਾਲਗ ਪੁੱਤਰ ਦੀ ਵੀ ਨੁਮਾਇੰਦਗੀ ਮਾਂ ਕਰਿਸ਼ਮਾ ਵੱਲੋਂ ਕਾਨੂੰਨੀ ਸਰਪ੍ਰਸਤ ਦੇ ਤੌਰ ’ਤੇ ਕੀਤੀ ਗਈ ਹੈ।
ਕਰਿਸ਼ਮਾ ਅਤੇ ਸੰਜੇ ਨੇ 2003 ਵਿੱਚ ਵਿਆਹ ਕੀਤਾ ਸੀ ਪਰ 2016 ਵਿੱਚ ਉਹਨਾਂ ਦਾ ਤਲਾਕ ਹੋ ਗਿਆ।