ਨਵੀਂ ਦਿੱਲੀ, 19 ਫ਼ਰਵਰੀ (ਪੀਟੀਆਈ) ਉਪ ਰਾਸ਼ਟਰਪਤੀ ਸੀ ਪੀ ਰਾਧਾਕ੍ਰਿਸ਼ਨਨ ਨੇ ਵੀਰਵਾਰ ਨੂੰ ਕਿਹਾ ਕਿ ਇੰਡੀਆ ਏਆਈ ਇੰਪੈਕਟ ਸਮਿਟ ਵਿੱਚ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਦਾ ਸੰਬੋਧਨ ਕ੍ਰਿਤ੍ਰਿਮ ਬੁੱਧੀ (ਏਆਈ) ਪ੍ਰਤੀ ਦੇਸ਼ ਦੇ ਦੂਰਦਰਸ਼ੀ ਅਤੇ ਜ਼ਿੰਮੇਵਾਰ ਰਵੱਈਏ ਨੂੰ ਦਰਸਾਉਂਦਾ ਹੈ।
ਉਨ੍ਹਾਂ ਕਿਹਾ ਕਿ ਮੋਦੀ ਵੱਲੋਂ ਪੇਸ਼ ਕੀਤਾ ਗਿਆ ‘ਮਾਨਵ’ (MANAV) ਵਿਜ਼ਨ ਤਕਨੀਕੀ ਤਰੱਕੀ ਦੇ ਕੇਂਦਰ ਵਿੱਚ ਮਨੁੱਖਤਾ ਨੂੰ ਰੱਖਦਾ ਹੈ।
ਐਕਸ ਉੱਤੇ ਇਕ ਪੋਸਟ ਵਿੱਚ ਉਪ ਰਾਸ਼ਟਰਪਤੀ ਨੇ ਕਿਹਾ ਕਿ ਨਵੀਨਤਾ, ਸਮਾਵੇਸ਼ਤਾ ਅਤੇ ਨੈਤਿਕ ਸ਼ਾਸਨ ਨਾਲ ਪ੍ਰੇਰਿਤ ਭਾਰਤ ਦੀ ਏਆਈ ਖੇਤਰ ਵਿੱਚ ਤਰੱਕੀ ਦੇਸ਼ ਨੂੰ ਇਸ ਬਦਲਾਅਕਾਰੀ ਤਕਨਾਲੋਜੀ ਦੇ ਭਵਿੱਖ ਨੂੰ ਆਕਾਰ ਦੇਣ ਵਿੱਚ ਵਿਸ਼ਵ ਪੱਧਰੀ ਨੇਤਾ ਬਣਾਉਂਦੀ ਹੈ।
ਪ੍ਰਧਾਨ ਮੰਤਰੀ ਮੋਦੀ ਨੇ ਕ੍ਰਿਤ੍ਰਿਮ ਬੁੱਧੀ ਦੇ ਲੋਕਤੰਤਰਿਕਰਨ ਅਤੇ ਇਸਨੂੰ ਸਮਾਵੇਸ਼ ਅਤੇ ਸਸ਼ਕਤੀਕਰਨ ਦਾ ਸਾਧਨ ਬਣਾਉਣ ਦੀ ਵਕਾਲਤ ਕੀਤੀ। ਉਨ੍ਹਾਂ ਕਿਹਾ ਕਿ ਮਨੁੱਖ ਸਿਰਫ਼ ਡਾਟਾ ਪੁਆਇੰਟ ਜਾਂ ਕੱਚਾ ਮਾਲ ਬਣ ਕੇ ਨਾ ਰਹਿ ਜਾਵੇ।
ਉਨ੍ਹਾਂ ਕਿਹਾ ਕਿ ਭਾਰਤ ਦਾ ਮੰਨਣਾ ਹੈ ਕਿ ਕ੍ਰਿਤ੍ਰਿਮ ਬੁੱਧੀ ਤਦ ਹੀ ਸੰਸਾਰ ਦੇ ਭਲੇ ਲਈ ਕੰਮ ਕਰੇਗੀ ਜਦੋਂ ਇਸਨੂੰ ਸਾਂਝਾ ਕੀਤਾ ਜਾਵੇ ਅਤੇ ਇਸਦੇ ਕੋਡ ਖੁੱਲ੍ਹੇ ਹੋਣ। ਉਨ੍ਹਾਂ ਜ਼ੋਰ ਦੇ ਕੇ ਕਿਹਾ ਕਿ ਭਾਰਤ ਏਆਈ ਤੋਂ ਡਰਦਾ ਨਹੀਂ, ਸਗੋਂ ਇਸ ਵਿੱਚ ਭਵਿੱਖ ਦੀ ਤਰੱਕੀ ਅਤੇ ਕੱਲ੍ਹ ਦੀ ਰੂਪਰੇਖਾ ਵੇਖਦਾ ਹੈ।
ਰਾਧਾਕ੍ਰਿਸ਼ਨਨ ਨੇ ਕਿਹਾ ਕਿ ਪਹੁੰਚਯੋਗਤਾ, ਜਵਾਬਦੇਹੀ ਅਤੇ ਵਿਸ਼ਵ ਪੱਧਰੀ ਸਹਿਯੋਗ ’ਤੇ ਜ਼ੋਰ ਇਹ ਯਕੀਨੀ ਬਣਾਉਂਦਾ ਹੈ ਕਿ ਏਆਈ ਸਾਂਝੀ ਤਰੱਕੀ ਅਤੇ ਭਲਾਈ ਦੀ ਤਾਕਤ ਬਣੇ।
ਉਨ੍ਹਾਂ ਕਿਹਾ, “ਮੈਨੂੰ ਵਿਸ਼ਵਾਸ ਹੈ ਕਿ ਇਸ ਅਗੇਤੀ ਦ੍ਰਿਸ਼ਟੀ ਹੇਠ ਕ੍ਰਿਤ੍ਰਿਮ ਬੁੱਧੀ ਸਸ਼ਕਤੀਕਰਨ, ਨਵੀਨਤਾ ਅਤੇ ਟਿਕਾਊ ਵਿਕਾਸ ਦਾ ਸਾਧਨ ਬਣੇਗੀ, ਜਿਸ ਨਾਲ ਸਿਰਫ਼ ਭਾਰਤ ਹੀ ਨਹੀਂ ਸਗੋਂ ਪੂਰੀ ਦੁਨੀਆ ਨੂੰ ਲਾਭ ਹੋਵੇਗਾ।”