ਵਾਸ਼ਿੰਗਟਨ, 8 ਜਨਵਰੀ (ਏਪੀ): ਅਮਰੀਕੀ ਵਿਦੇਸ਼ ਮੰਤਰੀ ਮਾਰਕੋ ਰੁਬਿਓ ਨੇ ਕਿਹਾ ਹੈ ਕਿ ਟਰੰਪ ਪ੍ਰਸ਼ਾਸਨ ਵੱਲੋਂ ਗ੍ਰੀਨਲੈਂਡ ਕਬਜ਼ੇ ਦੀ ਇੱਛਾ ਨੂੰ ਦੁਹਰਾਉਣ ਤੋਂ ਬਾਅਦ ਉਹ ਅਗਲੇ ਹਫ਼ਤੇ ਡੈਨਮਾਰਕ ਦੇ ਅਧਿਕਾਰੀਆਂ ਨਾਲ ਮੁਲਾਕਾਤ ਕਰਨਗੇ।
ਟਰੰਪ ਦਾ ਮੰਨਣਾ ਹੈ ਕਿ ਚੀਨ ਅਤੇ ਰੂਸ ਵੱਲੋਂ ਆਰਕਟਿਕ ਖੇਤਰ ਵਿੱਚ ਵਧ ਰਹੇ ਖ਼ਤਰਿਆਂ ਦੇ ਮੱਦੇਨਜ਼ਰ ਅਮਰੀਕਾ ਲਈ ਦੁਨੀਆ ਦੇ ਸਭ ਤੋਂ ਵੱਡੇ ਟਾਪੂ ‘ਤੇ ਕਾਬੂ ਜ਼ਰੂਰੀ ਹੈ।
ਡੈਨਮਾਰਕ ਅਤੇ ਗ੍ਰੀਨਲੈਂਡ ਦੇ ਵਿਦੇਸ਼ ਮੰਤਰੀਆਂ ਨੇ ਰੁਬਿਓ ਨਾਲ ਮਿਲਣ ਦੀ ਬੇਨਤੀ ਕੀਤੀ ਸੀ। ਰੁਬਿਓ ਨੇ ਅਮਰੀਕੀ ਸੰਸਦ ਮੈਂਬਰਾਂ ਨੂੰ ਦੱਸਿਆ ਕਿ ਗ੍ਰੀਨਲੈਂਡ ਨੂੰ ਫੌਜੀ ਤਾਕਤ ਨਾਲ ਨਹੀਂ, ਸਗੋਂ ਖਰੀਦ ਰਾਹੀਂ ਹਾਸਲ ਕਰਨ ਦੀ ਯੋਜਨਾ ਹੈ।
ਯੂਰਪੀ ਨੇਤਾਵਾਂ ਨੇ ਇਸ ਮਾਮਲੇ ‘ਤੇ ਗੰਭੀਰ ਚਿੰਤਾ ਜ਼ਾਹਰ ਕੀਤੀ ਹੈ ਅਤੇ ਕਿਹਾ ਹੈ ਕਿ ਗ੍ਰੀਨਲੈਂਡ “ਉਥੋਂ ਦੇ ਲੋਕਾਂ ਦਾ ਹੈ।”
ਰੁਬਿਓ ਨੇ ਕਿਹਾ ਕਿ ਗੱਲਬਾਤ ਕੂਟਨੀਤੀ ਰਾਹੀਂ ਹੋਵੇਗੀ, ਹਾਲਾਂਕਿ ਹਰ ਰਾਸ਼ਟਰਪਤੀ ਕੋਲ ਰਾਸ਼ਟਰੀ ਸੁਰੱਖਿਆ ਲਈ ਫੌਜੀ ਵਿਕਲਪ ਹੁੰਦਾ ਹੈ।
(AP)