ਮੁੰਬਈ, 7 ਸਤੰਬਰ (ਪੀਟੀਆਈ): ਬਾਰਿਸ਼ ਅਤੇ ਬੰਬ ਦੀ ਧਮਕੀ ਦੇ ਬਾਵਜੂਦ ਹਜ਼ਾਰਾਂ ਭਗਤਾਂ ਨੇ ਸ਼ਨੀਵਾਰ ਨੂੰ ਆਪਣੇ ਪਿਆਰੇ ਗਣਪਤੀ ਬਾਪਾ ਨੂੰ ਵਿਦਾ ਕੀਤਾ। ਢੋਲ-ਤਾਸ਼ਿਆਂ ਦੀਆਂ ਧੁਨਾਂ ਤੇ ਗੁਲਾਲ ਦੇ ਬੱਦਲਾਂ ਵਿਚ 10 ਦਿਨਾਂ ਦਾ ਗਣੇਸ਼ ਉਤਸਵ ਮੁਕੰਮਲ ਹੋਇਆ।
ਰਾਤ 9 ਵਜੇ ਤੱਕ ਮੁੰਬਈ ਵਿਚ 18 ਹਜ਼ਾਰ ਤੋਂ ਵੱਧ ਮੂਰਤੀਆਂ ਵੱਖ-ਵੱਖ ਪਾਣੀ ਦੇ ਸਰੋਤਾਂ ਵਿਚ ਵਿਸਰਜਿਤ ਕੀਤੀਆਂ ਗਈਆਂ। ਬ੍ਰਿਹਨਮੁੰਬਈ ਮਹਾਂਨਗਰ ਪਾਲਿਕਾ ਦੇ ਅਧਿਕਾਰੀਆਂ ਨੇ ਕਿਹਾ ਕਿ ਵਿਸਰਜਨ ਦੌਰਾਨ ਕੋਈ ਅਣਚਾਹੀ ਘਟਨਾ ਨਹੀਂ ਵਾਪਰੀ।
ਸ਼ਹਿਰ ਦੇ ਵੱਖ-ਵੱਖ ਹਿੱਸਿਆਂ ਵਿੱਚ ਲਾਲਬਾਗ ਦੇ ਮੰਡਲਾਂ ਦੀਆਂ ਪ੍ਰਸਿੱਧ ਮੂਰਤੀਆਂ ਜਿਵੇਂ ਲਾਲਬਾਗਚਾ ਰਾਜਾ, ਚਿੰਚਪੋਕਲੀਚਾ ਚਿੰਤਾਮਣੀ, ਗਣੇਸ਼ ਗਲੀ ਦਾ ਮੁੰਬਈਚਾ ਰਾਜਾ ਅਤੇ ਕਾਲਾਚੌਕੀ ਦਾ ਮਹਾਗਣਪਤੀ ਆਦਿ ਦੀਆਂ ਯਾਤਰਾਵਾਂ ਨਿਕਲੀਆਂ।
ਲਾਲਬਾਗ ਦੇ ਸ਼੍ਰੌਫ਼ ਬਿਲਡਿੰਗ ‘ਤੇ ਲਾਲਬਾਗਚਾ ਰਾਜਾ ਦੀ ਮੂਰਤੀ ਉੱਤੇ ਸ਼ਾਮ 5.30 ਵਜੇ “ਪੁਸ਼ਪ ਵਰਖਾ” ਕੀਤੀ ਗਈ।
ਸ਼ਹਿਰ ਵਿੱਚ ਕਾਨੂੰਨ-ਵਿਵਸਥਾ ਬਰਕਰਾਰ ਰੱਖਣ ਲਈ 21 ਹਜ਼ਾਰ ਤੋਂ ਵੱਧ ਪੁਲਿਸ ਮੁਲਾਜ਼ਮ ਤੈਨਾਤ ਕੀਤੇ ਗਏ। ਇਸ ਦੌਰਾਨ ਪੁਲਿਸ ਨੂੰ ਇਕ ਧਮਕੀ ਸੁਨੇਹਾ ਮਿਲਿਆ ਸੀ ਕਿ 14 ਅੱਤਵਾਦੀ 400 ਕਿਲੋਗ੍ਰਾਮ RDX ਨਾਲ ਸ਼ਹਿਰ ਵਿੱਚ ਦਾਖਲ ਹੋਏ ਹਨ।
ਪੁਲਿਸ ਨੇ ਨੋਇਡਾ (ਉੱਤਰ ਪ੍ਰਦੇਸ਼) ਤੋਂ 50 ਸਾਲਾ ਅਸ਼ਵਿਨੀ ਕੁਮਾਰ ਸੁਪਰਾ ਨੂੰ ਗ੍ਰਿਫ਼ਤਾਰ ਕਰ ਲਿਆ। ਕ੍ਰਾਈਮ ਬ੍ਰਾਂਚ ਨੇ 24 ਘੰਟਿਆਂ ਦੇ ਅੰਦਰ ਉਸ ਨੂੰ ਪਕੜ ਲਿਆ।
ਸ਼੍ਰੇਣੀ: ਬ੍ਰੇਕਿੰਗ ਨਿਊਜ਼