ಗುರುಗ್ರಾಮ್, ಅಕ್ಟೋಬರ್ 27 (ಪಿಟಿಐ): ಫರಹಾನ್ ಅಖ್ತರ್ ಅವರ ‘120 ಬಹಾದುರ್’ ಸಿನಿಮಾಗೆ ವಿರೋಧವಾಗಿ ಅದರ ಹೆಸರು ಬದಲಿಸಬೇಕು ಎಂದು ಆಗ್ರಹಿಸಿ ನೂರಾರು ಅಹೀರ್ ಸಮುದಾಯದ ಸದಸ್ಯರು ಭಾನುವಾರ ಇಲ್ಲಿ ಮುಖ್ಯ ಹೆದ್ದಾರಿಯನ್ನು ತಡೆದು ಪ್ರತಿಭಟನೆ ನಡೆಸಿದರು.
‘ಸಂಯುಕ್ತ ಅಹೀರ್ ರೆಜಿಮೆಂಟ್ ಮೋರ್ಚಾ’ ಪ್ರಕಟಿಸಿದ ಹೇಳಿಕೆಯಲ್ಲಿ, 1962ರ ಇಂಡೋ–ಚೀನಾ ಯುದ್ಧವನ್ನು ಆಧರಿಸಿ ನಿರ್ಮಿಸಿರುವ ಈ ಚಿತ್ರದ പേരನ್ನು ‘120 ವೀರ ಅಹೀರ್’ ಎಂದು ಬದಲಿಸಬೇಕೆಂದು ಪ್ರತಿಭಟನಾಕಾರರು ಖೇರ್ಕಿ ದೌಲಾ ಟೋಲ್ ಪ್ಲಾಜಾದಿಂದ ದೆಹಲಿ ಗಡಿವರೆಗೆ ಪಾದಯಾತ್ರೆ ನಡೆಸಿದ್ದಾರೆ.
1962ರಲ್ಲಿ ರೆಜಾಂಗ್ ಲಾ ಪ್ರದೇಶವನ್ನು ರಕ್ಷಿಸಿದ 13ನೇ ಕುಮಾವೋನ್ ಪಡೆಯ 120 ಅಹೀರ್ ಸೈನಿಕರ ಬಲಿದಾನಕ್ಕೆ ಸೂಕ್ತ ಗೌರವ ನೀಡಲಾಗಿಲ್ಲ ಎಂಬುದು ಆರೋಪ.
“ಚಿತ್ರದ ಹೆಸರು ಬದಲಿಸದಿದ್ದರೆ ಹರಿಯಾಣದಲ್ಲಿ ಹಾಗೂ ನಮ್ಮ ಸಮುದಾಯ ಇರುವ ಎಲ್ಲೆಡೆ ಚಲನಚಿತ್ರ ಪ್ರಸಾರವನ್ನು ತಡೆಯಲಾಗುವುದು. ಇದಕ್ಕಾಗಿ ಮುಖ್ಯಮಂತ್ರಿ ನಾಯಬ್ ಸಿಂಗ್ ಸೈನಿ ಅವರನ್ನು ಭೇಟಿಯಾಗುತ್ತೇವೆ” ಎಂದು ವಕೀಲ ಸುಭೇ ಸಿಂಗ್ ಯಾದವ್ ಹೇಳಿದರು.
ಈ ಕುರಿತು ಸುಪ್ರೀಂ ಕೋರ್ಟ್ನಲ್ಲಿ ಅರ್ಜಿ ಸಲ್ಲಿಸಲು ಸಿದ್ಧತೆ ನಡೆಯುತ್ತಿದೆ ಎಂದರು.
ಪ್ರತಿಭಟನೆಯ ಪರಿಣಾಮವಾಗಿ ಎನ್ಎಚ್-48ರಲ್ಲಿ ಒಂದು ಕಿಲೋಮೀಟರ್ಗಿಂತ ಹೆಚ್ಚು ದೂರ ಟ್ರಾಫಿಕ್ ಜಾಂ ಉಂಟಾಗಿದೆ ಎಂದು ಪೊಲೀಸರ ಮಾಹಿತಿ.