ಮಸ್ಕಟ್, ಡಿಸೆಂಬರ್ 18 (ಪಿಟಿಐ): ಭಾರತ–ಒಮಾನ್ ದ್ವೈಪಕ್ಷಿಕ ಸಂಬಂಧಗಳನ್ನು ಬಲಪಡಿಸಿದ ಕೊಡುಗೆಗಾಗಿ ಪ್ರಧಾನಿ ನರೇಂದ್ರ ಮೋದಿಗೆ ಗುರುವಾರ ಒಮಾನ್ನ ಸುಲ್ತಾನ್ ಹೈತಮ್ ಬಿನ್ ತಾರಿಕ್ ‘ಆರ್ಡರ್ ಆಫ್ ಒಮಾನ್’ ಪ್ರಶಸ್ತಿಯನ್ನು ಪ್ರದಾನಿಸಿದರು. ಇದು ಒಮಾನ್ನ ಅತ್ಯಂತ ವಿಶಿಷ್ಟ ನಾಗರಿಕ ಗೌರವವಾಗಿದೆ.
ಎರಡು ದಿನಗಳ ಒಮಾನ್ ಭೇಟಿಯ ವೇಳೆ ಪ್ರಧಾನಿ ಮೋದಿಗೆ ಈ ಗೌರವ ಲಭಿಸಿತು. ಜೋರ್ಡಾನ್ ಮತ್ತು ಇಥಿಯೋಪಿಯಾ ಒಳಗೊಂಡ ಮೂರು ರಾಷ್ಟ್ರಗಳ ಪ್ರವಾಸದ ಕೊನೆಯ ಹಂತ ಇದು.
ಇಥಿಯೋಪಿಯಾದ ‘ಗ್ರೇಟ್ ಆನರ್ ನಿಶಾನ್ ಆಫ್ ಇಥಿಯೋಪಿಯಾ’ ಹಾಗೂ ಕುವೈತ್ನ ‘ಆರ್ಡರ್ ಆಫ್ ಮುಬಾರಕ್ ಅಲ್-ಕಬೀರ್’ ಸೇರಿದಂತೆ ವಿದೇಶಿ ರಾಷ್ಟ್ರಗಳಿಂದ ಲಭಿಸಿರುವ 28ಕ್ಕೂ ಹೆಚ್ಚು ಉನ್ನತ ನಾಗರಿಕ ಪ್ರಶಸ್ತಿಗಳ ಪಟ್ಟಿಗೆ ಇದು ಹೊಸ ಸೇರ್ಪಡೆಯಾಗಿದೆ.
ಭಾರತ–ಒಮಾನ್ ರಾಜತಾಂತ್ರಿಕ ಸಂಬಂಧಗಳ 70ನೇ ವರ್ಷದ ಸಂದರ್ಭದಲ್ಲಿ ನಡೆಯುತ್ತಿರುವ ಈ ಭೇಟಿಯಲ್ಲಿ ವ್ಯಾಪಾರ, ಹೂಡಿಕೆ, ಇಂಧನ, ರಕ್ಷಣಾ ಮತ್ತು ಸಾಂಸ್ಕೃತಿಕ ಕ್ಷೇತ್ರಗಳಲ್ಲಿ ತಂತ್ರಾತ್ಮಕ ಸಹಭಾಗಿತ್ವವನ್ನು ಗಟ್ಟಿಗೊಳಿಸುವುದಕ್ಕೆ ಎರಡೂ ದೇಶಗಳು ಒತ್ತು ನೀಡಿವೆ.
ಬುಧವಾರ ಮಸ್ಕಟ್ಗೆ ಆಗಮಿಸಿದ ಪ್ರಧಾನಿ ಮೋದಿಗೆ ಗಾರ್ಡ್ ಆಫ್ ಆನರ್ ಸೇರಿದಂತೆ ಭವ್ಯ ಸ್ವಾಗತ ದೊರಕಿತು.