सिंगापूर, ४ ऑगस्ट (PTI) — सिंगापूर रिपब्लिक नेव्ही (RSN) आणि भारतीय नौदलाने २८ जुलै ते १ ऑगस्ट दरम्यान झालेला वार्षिक सिंगापूर-भारत द्विपक्षीय समुद्री सराव (SIMBEX) यशस्वीरित्या पूर्ण केला आहे.
या वर्षीच्या सरावामध्ये चांगी नेव्हल बेसवरील किनारी टप्पा आणि दक्षिण चीन समुद्राच्या दक्षिणेकडील भागात झालेला सागरी टप्पा यांचा समावेश होता. सागरी टप्प्यात दोन्ही नौदलांची जहाजे आणि सिंगापूर हवाई दलाची (RSAF) विमाने सहभागी झाली होती, असे संरक्षण मंत्रालयाने सांगितले.
RSN कडून फॉर्मिडेबल-श्रेणीचे फ्रिगेट RSS Supreme आणि व्हिक्टरी-श्रेणीचे मिसाइल कर्व्हेट RSS Vigilance तसेच MV Mentor सहभागी झाले. भारतीय नौदलाने शिवालिक-श्रेणीचे फ्रिगेट INS सतपुडा पाठवले. याशिवाय RSAF कडून S70B नौदल हेलिकॉप्टर, दोन फॉकर-५० मेरीटाईम गस्ती विमाने आणि दोन F-15SG फायटर विमानेही सहभागी झाली.
किनारी टप्प्यात संयुक्त नियोजन, सिम्युलेटर प्रशिक्षण, व्यावसायिक देवाण-घेवाण आणि क्रीडा स्पर्धा यांचा समावेश होता. विषय तज्ज्ञ देवाण-घेवाण सत्रात दोन्ही नौदलांनी मेरीटाईम एअर ऑपरेशन्स आणि बोर्डिंग प्रक्रियेतील सर्वोत्तम अनुभव शेअर केले.
समुद्रात युद्धाभ्यास, हवाई संरक्षण सराव आणि समुद्री सुरक्षा सरावासारख्या गुंतागुंतीच्या सरावांचे आयोजन करण्यात आले. शेवटी सहभागी जहाजांनी सागरी संचलन (sail-past) केले.
SIMBEX 2025 च्या यशस्वी आयोजनामुळे भारतीय नौदल आणि सिंगापूर नौदल यांच्यातील दृढ भागीदारी अधोरेखित होते.
RSS Supreme चे कमांडिंग ऑफिसर लेफ्टनंट कर्नल आरोन कोह म्हणाले, “SIMBEX हे दोन्ही नौदलांमधील दीर्घकालीन संबंधांचे प्रतीक आहे. वर्षानुवर्षे हा सराव अनेक पिढ्यांच्या नौसैनिकांना कौशल्य वाढवण्याचे, परस्पर समज विकसित करण्याचे आणि लोकांमधील संबंध दृढ करण्याचे व्यासपीठ ठरले आहे.”
१९९४ मध्ये सुरू झालेला SIMBEX यावर्षी ३२व्या वर्षात पदार्पण करतो, जो RSN च्या सर्वांत दीर्घकालीन द्विपक्षीय सरावांपैकी एक आहे आणि भारताचा कोणत्याही देशासोबतचा सातत्याने सुरू असलेला सर्वांत जुना नौदल सराव आहे.
यंदाचा SIMBEX दोन्ही देशांमध्ये राजनैतिक संबंध स्थापन होण्याच्या ६०व्या वर्धापन दिनाच्या पार्श्वभूमीवर होतोय.
SIMBEX ची गुंतागुंत हळूहळू वाढत असून आता यात समुद्री सुरक्षा तसेच हवाई, पृष्ठभाग आणि पाण्याखालील क्षेत्रातील सराव समाविष्ट आहेत. या व्यतिरिक्त दोन्ही नौदल विविध व्यावसायिक देवाण-घेवाण, स्टाफ टॉक्स आणि प्रशिक्षण कार्यक्रमांतून नियमित संवाद साधतात. PTI GS RC