ਬਿਲਾਸਪੁਰ (ਛੱਤੀਸਗੜ੍ਹ), 5 ਨਵੰਬਰ (ਪੀ.ਟੀ.ਆਈ.) — ਬਿਲਾਸਪੁਰ ਰੇਲਵੇ ਸਟੇਸ਼ਨ ਦੇ ਨੇੜੇ ਇੱਕ ਯਾਤਰੀ ਟ੍ਰੇਨ ਅਤੇ ਮਾਲਗੱਡੀ ਦੀ ਟੱਕਰ ਵਿੱਚ ਮਰਨ ਵਾਲਿਆਂ ਦੀ ਗਿਣਤੀ 11 ਤੱਕ ਪਹੁੰਚ ਗਈ ਹੈ, ਅਧਿਕਾਰੀਆਂ ਨੇ ਬੁੱਧਵਾਰ ਨੂੰ ਕਿਹਾ।
ਇਹ ਘਟਨਾ ਮੰਗਲਵਾਰ ਸ਼ਾਮ ਕਰੀਬ 4 ਵਜੇ ਹੋਈ ਜਦੋਂ ਗੈਵਰਾ (ਕੋਰਬਾ ਜ਼ਿਲ੍ਹੇ) ਤੋਂ ਬਿਲਾਸਪੁਰ ਵੱਲ ਆ ਰਹੀ ਐਮ.ਈ.ਐਮ.ਯੂ. (ਮੁੱਖ ਲਾਈਨ ਇਲੈਕਟ੍ਰਿਕ ਮਲਟੀਪਲ ਯੂਨਿਟ) ਟ੍ਰੇਨ ਮਾਲਗੱਡੀ ਨਾਲ ਟਕਰਾ ਗਈ।
“ਇਸ ਹਾਦਸੇ ਵਿੱਚ 11 ਲੋਕਾਂ ਦੀ ਮੌਤ ਹੋ ਗਈ ਹੈ ਅਤੇ 20 ਹੋਰ ਜ਼ਖ਼ਮੀ ਹੋਏ ਹਨ,” ਰੇਲਵੇ ਵੱਲੋਂ ਜਾਰੀ ਬਿਆਨ ਵਿੱਚ ਕਿਹਾ ਗਿਆ।
ਰੇਲਵੇ ਪ੍ਰਸ਼ਾਸਨ ਨੇ ਤੁਰੰਤ ਰਾਹਤ ਅਤੇ ਬਚਾਵ ਕਾਰਜ ਸ਼ੁਰੂ ਕਰ ਦਿੱਤੇ। ਜ਼ਖ਼ਮੀਆਂ ਦਾ ਇਲਾਜ ਨੇੜਲੇ ਹਸਪਤਾਲਾਂ ਵਿੱਚ ਕੀਤਾ ਜਾ ਰਿਹਾ ਹੈ।
ਟੱਕਰ ਇੰਨੀ ਭਿਆਨਕ ਸੀ ਕਿ ਯਾਤਰੀ ਟ੍ਰੇਨ ਦਾ ਇੱਕ ਡੱਬਾ ਮਾਲਗੱਡੀ ਦੇ ਇੱਕ ਵੈਗਨ ਦੇ ਉੱਪਰ ਚੜ੍ਹ ਗਿਆ।
ਜ਼ਖ਼ਮੀ ਯਾਤਰੀਆਂ ਨੂੰ ਅਪੋਲੋ ਹਸਪਤਾਲ ਅਤੇ ਛੱਤੀਸਗੜ੍ਹ ਇੰਸਟੀਚਿਊਟ ਆਫ ਮੈਡੀਕਲ ਸਾਇੰਸਜ਼ (CIMS) ਵਿੱਚ ਭਰਤੀ ਕਰਵਾਇਆ ਗਿਆ ਹੈ।
ਇੱਕ ਸੀਨੀਅਰ ਰੇਲਵੇ ਅਧਿਕਾਰੀ ਨੇ ਦੱਸਿਆ ਕਿ “ਯਾਤਰੀ ਟ੍ਰੇਨ ਨੇ ਲਾਲ ਸਿਗਨਲ ਪਾਰ ਕਰਕੇ 60 ਤੋਂ 70 ਕਿਲੋਮੀਟਰ ਪ੍ਰਤੀ ਘੰਟਾ ਦੀ ਗਤੀ ਨਾਲ ਮਾਲਗੱਡੀ ਨੂੰ ਪਿੱਛੋਂ ਟਕਰ ਮਾਰੀ।”
“ਇਹ ਜਾਂਚ ਦਾ ਵਿਸ਼ਾ ਹੈ ਕਿ ਲੋਕੋ ਪਾਇਲਟ ਨੇ ਲਾਲ ਸਿਗਨਲ ਕਿਉਂ ਪਾਰ ਕੀਤਾ ਅਤੇ ਐਮਰਜੈਂਸੀ ਬ੍ਰੇਕ ਸਮੇਂ ’ਤੇ ਕਿਉਂ ਨਹੀਂ ਲਗਾਈ,” ਅਧਿਕਾਰੀ ਨੇ ਕਿਹਾ।
ਯਾਤਰੀ ਟ੍ਰੇਨ ਦਾ ਲੋਕੋ ਪਾਇਲਟ ਵਿਦਿਆ ਸਾਗਰ ਹਾਦਸੇ ਵਿੱਚ ਮਾਰਿਆ ਗਿਆ, ਜਦਕਿ ਸਹਾਇਕ ਲੋਕੋ ਪਾਇਲਟ ਰਸ਼ਮੀ ਰਾਜ ਗੰਭੀਰ ਜ਼ਖ਼ਮੀ ਹੋਈ।
ਟੱਕਰ ਨਾਲ ਬ੍ਰੇਕ ਵੈਨ ਬੁਰੀ ਤਰ੍ਹਾਂ ਕੁਚਲ ਗਈ। ਮਾਲਗੱਡੀ ਦਾ ਗਾਰਡ ਆਖਰੀ ਸਮੇਂ ਤੇ ਕੂਦ ਕੇ ਬਚ ਗਿਆ, ਪਰ ਉਸ ਨੂੰ ਹਲਕੇ ਜ਼ਖ਼ਮ ਆਏ।
ਰੇਲਵੇ ਨੇ ਮਰਨ ਵਾਲਿਆਂ ਦੇ ਪਰਿਵਾਰਾਂ ਨੂੰ 10 ਲੱਖ ਰੁਪਏ, ਗੰਭੀਰ ਜ਼ਖ਼ਮੀਆਂ ਨੂੰ 5 ਲੱਖ ਅਤੇ ਹਲਕੇ ਜ਼ਖ਼ਮੀਆਂ ਨੂੰ 1 ਲੱਖ ਰੁਪਏ ਦੀ ਸਹਾਇਤਾ ਦਾ ਐਲਾਨ ਕੀਤਾ।
ਇਸ ਹਾਦਸੇ ਦੀ ਵਿਸਤ੍ਰਿਤ ਜਾਂਚ ਕਮਿਸ਼ਨਰ ਆਫ ਰੇਲਵੇ ਸੇਫਟੀ (CRS) ਦੇ ਪੱਧਰ ’ਤੇ ਕੀਤੀ ਜਾਵੇਗੀ।
ਛੱਤੀਸਗੜ੍ਹ ਦੇ ਮੁੱਖ ਮੰਤਰੀ ਵਿਸ਼ਣੂ ਦੇਵ ਸਾਈ ਨੇ ਹਾਦਸੇ ’ਤੇ ਦੁੱਖ ਜਤਾਇਆ ਅਤੇ ਮਰਨ ਵਾਲਿਆਂ ਦੇ ਪਰਿਵਾਰਾਂ ਨੂੰ 5 ਲੱਖ ਤੇ ਜ਼ਖ਼ਮੀਆਂ ਨੂੰ 50 ਹਜ਼ਾਰ ਰੁਪਏ ਦੇਣ ਦਾ ਐਲਾਨ ਕੀਤਾ।