ਫਨੋਮ ਪੇਨ੍ਹ (ਕੈਂਬੋਡੀਆ), 13 ਨਵੰਬਰ (ਏਪੀ): ਕੈਂਬੋਡੀਆ ਨੇ ਵੀਰਵਾਰ ਨੂੰ ਥਾਈਲੈਂਡ ਨਾਲ ਆਪਣੀ ਵਿਵਾਦਿਤ ਸਰਹੱਦ ’ਤੇ ਸਥਿਤ ਇੱਕ ਪਿੰਡ ਵਿਚੋਂ ਸੈਂਕੜੇ ਲੋਕਾਂ ਨੂੰ ਖਾਲੀ ਕਰਵਾਇਆ, ਇੱਕ ਦਿਨ ਬਾਅਦ ਜਦੋਂ ਉੱਥੇ ਦੋਵੇਂ ਦੇਸ਼ਾਂ ਵਿਚ ਗੋਲੀਬਾਰੀ ਹੋਈ ਸੀ ਜਿਸ ਵਿੱਚ ਇੱਕ ਕੈਂਬੋਡੀਆਈ ਦੀ ਮੌਤ ਹੋ ਗਈ ਸੀ।
ਥਾਈਲੈਂਡ ਨੇ ਕੈਂਬੋਡੀਆ ਨੂੰ ਲੈਂਡਮਾਈਨ ਧਮਾਕੇ ਲਈ ਜ਼ਿੰਮੇਵਾਰ ਠਹਿਰਾਇਆ ਅਤੇ ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਦੀ ਮਧਸਥਤਾ ਨਾਲ ਹੋਏ ਯੁੱਧਵਿਰਾਮ ਸਮਝੌਤੇ ਨੂੰ ਅੰਸ਼ਿਕ ਤੌਰ ’ਤੇ ਰੱਦ ਕਰ ਦਿੱਤਾ।
ਬਾਂਤਿਆ ਮੀਨਚੇ ਪ੍ਰਾਂਤ ਦੇ ਪ੍ਰੇ ਚਾਨ ਪਿੰਡ ਦੇ ਲਗਭਗ 250 ਪਰਿਵਾਰਾਂ ਨੂੰ 30 ਕਿਲੋਮੀਟਰ ਦੂਰ ਇਕ ਬੌਧ ਮੰਦਰ ਵਿਚ ਸ਼ਰਨ ਦਿੱਤੀ ਗਈ।
ਪ੍ਰਧਾਨ ਮੰਤਰੀ ਹੁਨ ਮਾਨੇਤ ਨੇ ਇਸ ਘਟਨਾ ਦੀ ਸੁਤੰਤਰ ਜਾਂਚ ਦੀ ਮੰਗ ਕੀਤੀ ਹੈ। ਥਾਈ ਫੌਜ ਨੇ ਕਿਹਾ ਕਿ ਕੈਂਬੋਡੀਆਈ ਸੈਨਿਕਾਂ ਨੇ ਥਾਈਲੈਂਡ ਦੀ ਸਾਈਡ ’ਤੇ ਗੋਲੀਆਂ ਚਲਾਈਆਂ, ਜਿਸਦਾ ਜਵਾਬ ਦੇਣ ਲਈ ਉਨ੍ਹਾਂ ਨੇ ਚੇਤਾਵਨੀ ਗੋਲੀਆਂ ਚਲਾਈਆਂ।
ਦੋਵੇਂ ਦੇਸ਼ਾਂ ਵਿਚਾਲੇ ਪੁਰਾਣੀ ਦੁਸ਼ਮਣੀ ਹੈ ਅਤੇ 1962 ਵਿਚ ਅੰਤਰਰਾਸ਼ਟਰੀ ਅਦਾਲਤ ਨੇ ਪ੍ਰੇਅ ਵਿਹੀਅਰ ਮੰਦਰ ਵਾਲਾ ਖੇਤਰ ਕੈਂਬੋਡੀਆ ਨੂੰ ਦਿੱਤਾ ਸੀ, ਜੋ ਅਜੇ ਵੀ ਥਾਈਲੈਂਡ ਲਈ ਵਿਵਾਦ ਦਾ ਵਿਸ਼ਾ ਹੈ।