ਨਵੀਂ ਦਿੱਲੀ, 3 ਦਸੰਬਰ (PTI): ਕੇਂਦਰੀ ਪ੍ਰਦੂਸ਼ਣ ਕੰਟਰੋਲ ਬੋਰਡ (CPCB) ਨੇ ਬੁੱਧਵਾਰ ਨੂੰ ਹਵਾ ਗੁਣਵੱਤਾ ਡਾਟੇ ਵਿੱਚ ਹੇਰਾਫੇਰੀ ਦੇ ਦੋਸ਼ਾਂ ਨੂੰ ਰੱਦ ਕਰਦੇ ਹੋਏ ਕਿਹਾ ਕਿ ਮਾਨੀਟਰਿੰਗ ਸਟੇਸ਼ਨ ਪੂਰੀ ਤਰ੍ਹਾਂ ਆਟੋਮੈਟਿਕ ਹਨ ਅਤੇ ਕਿਸੇ ਵੀ ਕਿਸਮ ਦੀ ਮਨੁੱਖੀ ਦਖਲਅੰਦਾਜ਼ੀ ਸੰਭਵ ਨਹੀਂ।
ਦਿੱਲੀ ਸਰਕਾਰ ‘ਤੇ ਦੋਸ਼ ਲੱਗੇ ਹਨ ਕਿ ਉਹ ਮਾਨੀਟਰਿੰਗ ਸਟੇਸ਼ਨਾਂ ਦੇ ਆਲੇ-ਦੁਆਲੇ ਪਾਣੀ ਛਿੜਕ ਰਹੀ ਹੈ ਤਾਂ ਜੋ ਨਤੀਜੇ ਘੱਟ ਆਉਣ ਅਤੇ ਦਿਵਾਲੀ ਦੌਰਾਨ ਫਟਾਕਿਆਂ ਨਾਲ ਪਾਲਿਊਸ਼ਨ ਵਧਣ ‘ਤੇ ਕੁਝ ਸਟੇਸ਼ਨ ਬੰਦ ਵੀ ਕੀਤੇ ਗਏ।
CPCB ਦੇ ਚੇਅਰਮੈਨ ਵੀਰ ਵਿਕਰਮ ਯਾਦਵ ਨੇ ਕਿਹਾ, “ਡਾਟਾ ਕਲੇਕਸ਼ਨ ਪੂਰੀ ਤਰ੍ਹਾਂ ਆਟੋਮੈਟਿਕ ਹੈ… ਹਰ 15 ਮਿੰਟ ਬਾਅਦ ਡਾਟਾ ਬਣਦਾ ਹੈ, ਘੰਟੇ ਬਾਅਦ AQI ਕੈਲਕੁਲੇਟ ਹੁੰਦਾ ਹੈ। ਇਹ ਸਟੇਸ਼ਨ ਮੈਨੁਅਲ ਨਹੀਂ, ਇਸ ਲਈ ਕਿਸੇ ਵੀ ਹੇਰਾਫੇਰੀ ਦੀ ਸੰਭਾਵਨਾ ਨਹੀਂ।”
ਪਾਣੀ ਛਿੜਕਣ ਦੇ ਦੋਸ਼ਾਂ ਬਾਰੇ ਉਨ੍ਹਾਂ ਨੇ ਕਿਹਾ, “ਸਟੇਸ਼ਨ ਦੀਆਂ ਥਾਵਾਂ ਵਿਗਿਆਨਕ ਅਧਿਐਨ ਤੋਂ ਬਾਅਦ ਚੁਣੀਆਂ ਗਈਆਂ ਹਨ।”
ਦਿੱਲੀ ‘ਚ 39 ਲਗਾਤਾਰ ਵਾਤਾਵਰਣ ਹਵਾ ਗੁਣਵੱਤਾ ਮਾਨੀਟਰਿੰਗ ਸਟੇਸ਼ਨ (CAAQM) ਹਨ—ਭਾਰਤ ਦੇ ਕਿਸੇ ਵੀ ਸ਼ਹਿਰ ਵਿੱਚ ਸਭ ਤੋਂ ਵੱਧ।
ਬੁੱਧਵਾਰ ਸਵੇਰੇ ਦਿੱਲੀ ਦੀ ਹਵਾ ‘ਬਹੁਤ ਖ਼ਰਾਬ’ ਸ਼੍ਰੇਣੀ ਵਿੱਚ ਸੀ। AQI 335—ਲਗਾਤਾਰ ਦੂਜਾ ਦਿਨ। ਐਤਵਾਰ ਤੇ ਸੋਮਵਾਰ ਨੂੰ ਕੁਝ ਸੁਧਾਰ ਆਇਆ ਸੀ ਪਰ ਮੰਗਲਵਾਰ ਨੂੰ ਫਿਰ ਹਾਲਤ ਖਰਾਬ ਹੋ ਗਈ।
AAP ਨੇ ਦੋਸ਼ ਲਾਇਆ ਕਿ ਮੋਬਾਈਲ ਐਪਸ ਸਰਕਾਰੀ ਸਟੇਸ਼ਨਾਂ ਦਾ ਡਾਟਾ ਵਰਤਦੀਆਂ ਹਨ ਅਤੇ ਇਹ ਡਾਟਾ ਬਦਲਿਆ ਜਾ ਰਿਹਾ ਹੈ।
AAP ਦਿੱਲੀ ਮੁਖੀ ਸੌਰਭ ਭਾਰਦਵਾਜ ਨੇ ਕਿਹਾ ਕਿ MCD ਦੇ ਟਰੱਕ “ਸਟੇਸ਼ਨਾਂ ਦੇ ਨੇੜੇ ਦਿਨ-ਰਾਤ ਪਾਣੀ ਛਿੜਕ ਰਹੇ ਹਨ।”
ਸ਼ਿਵ ਸੈਨਾ (UBT) ਦੇ ਆਦਿਤਿਆ ਠਾਕਰੇ ਨੇ ਵੀ ਅਸਲ AQI ਲੁਕਾਉਣ ਦੇ ਦੋਸ਼ ਲਾਏ।
ਉਹਨਾਂ ਨੇ ਕਿਹਾ, “ਦਿੱਲੀ ਦਾ ਪ੍ਰਦੂਸ਼ਣ ਚਿੰਤਾਜਨਕ ਹੈ। ਇਸ ਤੋਂ ਵੀ ਚਿੰਤਾਜਨਕ AQI ਲੁਕਾਉਣ ਦੀ ਕੋਸ਼ਿਸ਼ ਹੈ। ਹਕ਼ੀਕਤ ਮੰਨਣ ਤੇ ਕਲਾਈਮੇਟ ਐਕਸ਼ਨ ਲਈ ਸਹਿਮਤੀ ਬਣਾਉਣ ਵਿੱਚ ਰੁਕਾਵਟ ਕੀ ਹੈ?”
ਪਿਛਲੇ ਮਹੀਨੇ ਮੁੱਖ ਮੰਤਰੀ ਰੇਖਾ ਗੁਪਤਾ ਨੇ ਵੀ ਦੋਸ਼ ਨਕਾਰ ਦਿੱਤੇ ਸਨ। PTI GJS GVS APL