कोलंबो, ८ डिसेंबर (PTI): श्रीलंकेत आलेल्या ‘डिट्वा’ चक्रीवादळानंतर भारताने उभारलेल्या मोबाइल रुग्णालयाने आतापर्यंत २,२०० हून अधिक आपत्तीग्रस्तांना वैद्यकीय मदत दिली आहे. पूरग्रस्त आणि पायाभूत सुविधांच्या झपाट्याने झालेल्या नुकसानीमुळे श्रीलंका गंभीर संकटातून जात आहे.
नोव्हेंबर १६ पासूनच्या भीषण पुर आणि दरडीखाली किमान ६२७ मृत, तर १९० जण बेपत्ता असल्याचे अधिकृत आकडे सांगतात.
महियांगनाया (कँडीजवळ) येथे उभारलेल्या भारतीय फील्ड हॉस्पिटलने ५ डिसेंबरपासून उपचार सुरू केले असून ६७ किरकोळ शस्त्रक्रिया आणि ३ मोठ्या शस्त्रक्रियाही केल्या आहेत. हे रुग्णालय भारतीय वायुसेनेच्या C-17 विमानाद्वारे ७८ जणांच्या वैद्यकीय पथकासह श्रीलंकेत पोहोचविण्यात आले आहे.
दरम्यान, भारतीय लष्करी अभियंते — श्रीलंका आर्मी इंजिनिअर्स आणि रोड डेव्हलपमेंट अथॉरिटीसोबत — किलिनोच्ची भागात चक्रीवादळामुळे मोडलेल्या A35 महामार्गावरील पूल हटवण्याचे व पुनर्बांधणीचे काम सुरू केले आहे.
भारताने तामिळनाडूतील नागरिकांनी दिलेले जवळपास १,००० टन अन्नपदार्थ व कपडे श्रीलंकेला पाठवले आहेत. त्यापैकी ३०० टन मदत रविवार सकाळी तीन भारतीय नौदल जहाजांद्वारे कोलंबो येथे पोहोचली. ही मदत भारताचे उच्चायुक्त संतोष झा यांनी श्रीलंकेच्या व्यापार मंत्र्यांना सुपूर्द केली.
भारताने २८ नोव्हेंबरला सुरू केलेल्या ‘ऑपरेशन सागर बंधु’ अंतर्गत आत्तापर्यंत —
- ५८ टन मदतसामग्री (धान्य, तंबू, ताडपत्री, स्वच्छता साहित्य, कपडे, पाणी शुद्धीकरण साहित्य, औषधे)
- ४.५ टन औषधे व शस्त्रक्रिया साहित्य
- ६० टन उपकरणे (जनरेटर, बोटी, मोटर्स, एक्झाव्हेटर्स)
- १८५ टन बेली-ब्रिज साहित्य व ४४ लष्करी अभियंते
- NDRF चे ८० तज्ज्ञ व K9 डॉग युनिट्स
श्रीलंकेत पाठवले आहेत.
महियांगनाया व्यतिरिक्त ज-एला आणि नेगोंबो येथेही वैद्यकीय केंद्रे कार्यरत आहेत. INS विक्रांत, INS उदयगिरी आणि INS सुकन्या यांनी तत्काळ बचावकार्य केले असून AIF चे MI-17 हेलिकॉप्टर बचाव व हवाई मदतकार्य करत आहेत.
श्रीलंका डीएमसीच्या विनंतीनंतर ISRO च्या नॅशनल रिमोट सेन्सिंग सेंटरनेही पूर स्थितीचे नकाशे व उपग्रह माहिती पुरवली आहे.