ਕੋੱਟਾਯਮ (ਕੇਰਲ), 2 ਜਨਵਰੀ (ਪੀਟੀਆਈ):
ਇੱਥੇ ਟੀਵੀ ਸੀਰੀਅਲ ਅਦਾਕਾਰ ਸਿੱਧਾਰਥ ਪ੍ਰਭੂ ਵੱਲੋਂ ਕਥਿਤ ਤੌਰ ‘ਤੇ ਚਲਾਈ ਗਈ ਕਾਰ ਦੀ ਟੱਕਰ ਨਾਲ ਗੰਭੀਰ ਜ਼ਖ਼ਮੀ ਹੋਏ ਇੱਕ ਲਾਟਰੀ ਵਿਕਰੇਤਾ ਦੀ ਇਲਾਜ ਦੌਰਾਨ ਮੌਤ ਹੋ ਗਈ। ਪੁਲਿਸ ਨੇ ਸ਼ੁੱਕਰਵਾਰ ਨੂੰ ਇਹ ਜਾਣਕਾਰੀ ਦਿੱਤੀ।
ਮ੍ਰਿਤਕ ਦੀ ਪਛਾਣ ਤਾਮਿਲਨਾਡੂ ਦੇ 60 ਸਾਲਾ ਥੰਕਰਾਜ ਵਜੋਂ ਹੋਈ ਹੈ।
ਇਹ ਹਾਦਸਾ ਕ੍ਰਿਸਮਸ ਦੀ ਪੂਰਵ ਸੰਧਿਆ ਨੂੰ ਕੋੱਟਾਯਮ ਵਿੱਚ ਐਮਸੀ ਰੋਡ ‘ਤੇ ਨੱਟਾਕੋਮ ਸਰਕਾਰੀ ਕਾਲਜ ਜੰਕਸ਼ਨ ਨੇੜੇ ਵਾਪਰਿਆ, ਜਦੋਂ ਪ੍ਰਭੂ ਦੀ ਕਾਰ ਨੇ ਸੜਕ ਕਿਨਾਰੇ ਤੁਰ ਰਹੇ ਥੰਕਰਾਜ ਨੂੰ ਟੱਕਰ ਮਾਰੀ।
ਉਨ੍ਹਾਂ ਨੂੰ ਤੁਰੰਤ ਕੋੱਟਾਯਮ ਮੈਡੀਕਲ ਕਾਲਜ ਹਸਪਤਾਲ ਲਿਜਾਇਆ ਗਿਆ। ਪੁਲਿਸ ਮੁਤਾਬਕ, ਵੀਰਵਾਰ ਦੇਰ ਰਾਤ ਉਨ੍ਹਾਂ ਦੀ ਮੌਤ ਹੋ ਗਈ।
ਪੁਲਿਸ ਨੇ ਦੱਸਿਆ ਕਿ ਹਾਦਸੇ ਸਮੇਂ ਅਦਾਕਾਰ ਸ਼ਰਾਬ ਦੇ ਨਸ਼ੇ ਵਿੱਚ ਸੀ ਅਤੇ ਕਾਰ ਤੇਜ਼ ਰਫ਼ਤਾਰ ਵਿੱਚ ਸੀ। ਹਾਦਸੇ ਤੋਂ ਬਾਅਦ ਉਸ ਦੀ ਸਥਾਨਕ ਲੋਕਾਂ ਨਾਲ ਤਕਰਾਰ ਹੋਈ, ਜੋ ਬਾਅਦ ਵਿੱਚ ਝਗੜੇ ਵਿੱਚ ਬਦਲ ਗਈ।
ਪੁਲਿਸ ਨੇ ਅਦਾਕਾਰ ਨੂੰ ਹਿਰਾਸਤ ਵਿੱਚ ਲਿਆ ਅਤੇ ਬਾਅਦ ਵਿੱਚ ਜ਼ਮਾਨਤ ‘ਤੇ ਛੱਡ ਦਿੱਤਾ।
ਚਿੰਗਾਵਨਮ ਪੁਲਿਸ ਨੇ ਕਿਹਾ ਕਿ ਥੰਕਰਾਜ ਦੀ ਮੌਤ ਦੇ ਮੱਦੇਨਜ਼ਰ ਕੇਸ ਦੀਆਂ ਧਾਰਾਵਾਂ ਵਿੱਚ ਤਬਦੀਲੀ ਕੀਤੀ ਜਾਵੇਗੀ।